Brostin hjörtu

Grafin leyndarmál er spennuþáttur sem vekur mann til umhugsunar

Leika lögregluteymið í Grafin leyndarmál.
Nicola Walker og Sanjeev Bhask Leika lögregluteymið í Grafin leyndarmál.

Grafin leyndarmál, Unforgotten, breska spennuþáttaröðin sem RÚV sýnir á þriðjudagskvöldum, verður betri með hverjum þætti. Í þáttum eins og þessum er ekki sérlega algengt að jafn vel sé hugað að sálfræðiþættinum og gert er þarna. Áhorfandinn fær glögga innsýn í sálarlíf persóna, sem sumar geyma leyndarmál sem vart þola dagsljósið.

Dagskrárlýsing benti til að hér væri á ferð dæmigerður spennuþáttur sem myndi halda manni við skjáinn: Lögreglan hefur morðrannsókn þegar bein ungs manns finnast í húsagrunni 39 árum eftir hvarf hans. Maður kom sér þægilega fyrir í sófanum á hverju þriðjudagskvöldi og horfði á þáttaröð sem er enn betri en maður hafði átt von á. Í þessum spennuþætti eru nokkrar aukapersónur sem eru á svipuðum aldri, eldra fólk sem braut af sér á yngri árum, mismikið reyndar, og gat ekki gleymt því sem það hafði gert á hlut annarra. Frábærir leikarar túlka þessar brotnu persónur á afar áhrifamikinn hátt og maður sér sorg og iðrun í lífsreyndum andlitum þeirra. Þetta er ansi magnað og það tekur stundum á að verða vitni að örvæntingu persóna.

Þetta eru þættir sem minna okkur á að lífið er þroskaferli eða ætti allavega að vera það. Eldri manneskja er ekki sú sama og hún var á unga aldri, heldur yfirleitt fremur vitrari (þótt ekki sé það algilt). En það hjálpar ekki þessum sakbitnu persónum sem þjást vegna þess sem þeim varð á svo mörgum árum fyrr.

Þetta er óvenjulegur spennuþáttur því hann vekur mann til umhugsunar.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.