Fyrrum starfsmaður Malbikunarstöðvarinnar Höfða talin hafa dregið að sér tugi milljóna króna

Sá grunaði lést fyrir nokkru síðan - Malbikunarstöðin er í eigu Reykjavíkurborgar

Hið meinta misferli er talið hafa staðið yfir á árunum 2010-2015 og nema rúmlega 30 milljónum króna.
Malbikunarstöðin Höfði Hið meinta misferli er talið hafa staðið yfir á árunum 2010-2015 og nema rúmlega 30 milljónum króna.

Fyrrum deildarstjóri sölu- og fjármáladeildar Malbikunarstöðvarinnar Höfða hf. er grunaður um dregið að sér yfir 30 milljónir króna á árunum 2010-2015. Maðurinn verður þó ekki sóttur til saka því hann lést fyrir nokkru síðan en þá var hann enn starfsmaður fyrirtækisins.

Ábending um hið meinta misferli barst framkvæmdastjóra fyrirtækisins, Halldóri Torfasyni, þann 21.desember síðastliðinn. Skoðun stjórnenda fyrirtækisins leiddi í ljós að bókhaldsgögn studdu þessar grunsemdir. Þá var stjórn fyrirtækisins og eiganda, sem er Reykjavíkurborg, þegar tilkynnt um þessar grunsemdir og hóf innri endurskoðun Reykjavíkurborgar þegar rannsókn málsins.

Frumskoðun Innri endurskoðunar leiddi í ljós að hið meinta misferli nemur rúmlega 30 mkr, eins og áður segir, og er talið hafa staðið yfir á sex ára tímabili, árin 2010-2015. Ekki eru vísbendingar um að deildarstjórinn hafi átt vitorðsmenn innan fyrirtækisins.

Niðurstöður Innri endurskoðunar verða lagðar fyrir Endurskoðunarnefnd Reykjavíkurborgar, sem hefur það hlutverk að ákveða með framhald málsins. Starfsfólki fyrirtækisins var tilkynnt um málið í dag. Í stuttu samtali við DV sagði Halldór að starfsfólk fyrirtækisins væri harmi slegið yfir fregnunum enda hafði starfsmaðurinn starfað í mörg ár hjá fyrirtækinu.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.