Leikmenn fengu áfall: Tveggja ára stúlka fékk hafnabolta í höfuðið

Leikmenn voru sumir hverjir í áfalli vegna atviksins.
Erfitt augnablik Leikmenn voru sumir hverjir í áfalli vegna atviksins.

Óhugnanlegt atvik átti sér stað í hafnaboltaleik á milli New York Yankees og Minnesota Twins á Yankee Stadium í gær þegar tveggja ára stúlka fékk hafnabolta í höfuðið.

Todd Frazier, leikmaður New York Yankees, hitti boltann þá illa með þeim afleiðingum að hann endaði utan vallar og í höfði stúlkunnar. Talið er að boltinn hafi verið á tæplega 170 kílómetra hraða þegar slysið varð. Um algjört óviljaverk var að ræða og voru leikmenn augljóslega miður sín yfir atvikinu, þá einna helst Frazier sem var með tárin í augunum.

Stúlkan var flutt á sjúkrahús og er líðan hennar eftir atvikum. Í frétt USA Today kemur fram að ekki liggi fyrir hvort hún þurfi að gangast undir aðgerð. „Ég hugsaði um mín börn. Ég á tvö börn undir þriggja ára og ég vona að það verði allt í lagi með hana,“ sagði Frazier eftir leikinn.

Málið hefur vakið upp umtal um öryggisráðstafanir á hafnaboltaleikjum en sambærilegt atvik átti sér stað á Yankee Stadium í sumar. Þá fékk áhorfandi boltann í höfuðið.

Félög eru ekki skyldug til að koma upp öryggisneti við nestu sætaraðirnar á völlum sínum, en þrátt fyrir það hafa mörg félög komið upp slíkum netum. Forsvarsmenn Yankees segja að það verði tekið til skoðunar að koma upp öryggisneti til að tryggja að þetta endurtaki sig ekki.



Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.