Íslenskir fíkniefnasalar rændir um hábjartan dag

Titringur í undirheimunum – Fíkniefnum og peningum rænt um hábjartan dag

Myndin tengist fréttinni ekki beint.
Lögregluaðgerð Myndin tengist fréttinni ekki beint.

Vopnað rán var framið um hábjartan dag síðastliðinn mánudag þegar fjórir menn rændu þann fimmta á bílastæði við Kauptún í Garðabæ. Samkvæmt upplýsingum frá lögreglu þekktust mennirnir en ekki fást upplýsingar um hverju var í raun og veru rænt. Þetta er sjöunda ránið á höfuðborgarsvæðinu á rétt rúmum mánuði en á þriðjudag var einnig framið vopnað rán í Apóteki Garðabæjar. Allir voru gerendurnir vopnaðir á einn eða annað hátt, með skotvopni, hníf eða blóðugri sprautunuál.

En hver ætli sé ástæðan fyrir fjölgun þessara brota? Samkvæmt heimildum DV hefur það færst í vöxt að fíkniefnaneytendur séu sjálfir að ræna fíkniefnasala með það fyrir augum að eiga fyrir neyslu sinni og eignast þá fjármuni sem hafa orðið til við sölu fíkniefnasalans fyrr um kvöldið. Þessi rán skipta tugum og hafa verið tíð á höfuðborgarsvæðinu, þá sérstaklega í Reykjanesbæ og Reykjavík. Beinast þessi rán aðallega að þeim sem eru með mikið magn af dýrum fíkniefnum á sér eins og til dæmis 80 milligramma OxyContin-töflur en þær kosta 8.000 krónur stykkið eða heilu glösin af 54 mg Concerta á 35.000 krónur.

Ekki tilkynnt um fjölda rána

Þessi tilfelli eru sjaldnast tilkynnt til lögreglu og virðast afskipti hennar algjörlega bundin við það hvort einhver óviðkomandi vitni hafi orðið að árásinni eða ekki. Allt er enn á huldu hvað hið vopnaða rán í Kauptúni varðar. Lögreglan verst allra fregna en segir að ránsfengurinn hafi verið smávægilegur.

DV komst í samband við ungan mann sem vildi ekki koma fram undir nafni. Hann býr nú á höfuðborgarsvæðinu en bjó í nokkra mánuði í Reykjanesbæ. Kærasta hans hafði fengið leigða námsmannaíbúð á Ásbrú vegna þess að hún stundaði nám við Háskóla Íslands, en hann sjálfur ætlaði á meðan að einbeita sér að sölu á fíkniefnum á svæðinu, aðallega kannabis en þó einhverju af amfetamíni.

Rændur í Keflavík

„Það selst ekkert af kókaíni á Suðurnesjum. Þar flæðir allt í amfetamíni og lélegu grasi þannig að ég ákvað að koma mér inn á þennan markað – vissi að það væri stór hópur hérna sem notaði fíkniefni og í stað þess að horfa upp á þetta rusl selt á toppverði þá ákvað ég að koma með góða vöru sem allir yrðu sáttir við,“ sagði maðurinn sem vildi taka fram að hann væri edrú í dag.

„Þegar ég var búinn að selja þarna í tvo mánuði þá var hringt í mig og ég beðinn um frekar mikið magn af fíkniefnum og auðvitað átti að staðgreiða allt. Ég vildi helst velja staðinn þarna uppi á Ásbrú í Reykjanesbæ þar sem ég þekki svæðið ágætlega en þeim fannst sá staður alveg glataður. Mig grunaði aldrei neitt því ég hafði aldrei einhvern veginn hugsað út í að ég kynni að verða rændur. Það var heimskulegt af mér,“ segir maðurinn en hann mælti sér mót við mennina við gamla bensínstöð uppi á Keflavíkurflugvelli.

Notuðu sprautunál og barefli

„Þeir koma fjórir út úr bílnum. Einn með stálrör. Annar með sprautunál og þriðji með hafnaboltakylfu. Ég næ ekki einu sinni að komast út úr bílnum áður en ég fæ hafnaboltakylfuna í hausinn og mér skipað að afhenda allt sem ég var með á mér. Ég neitaði en þá fékk ég blóðuga sprautunálina upp að andlitinu á mér og mér sagt að ég yrði smitaður af HIV ef ég myndi ekki hlýða,“ segir maðurinn sem lét þá mennina fá um sjötíu þúsund krónur, tuttugu grömm af amfetamíni og tuttugu grömm af grasi.

„Þetta var tæpur tvö hundruð kall svona á götunni. Það skipti mig engu máli eftir þetta. Ég frétti síðar að þetta væri hópur sem stundaði þetta, hvort sem það væri í Keflavík eða Reykjavík,“ segir maðurinn sem heldur að söluhóparnir á Facebook séu þeir hættulegustu.

Facebook hættulegast

„Auðvitað er hægt að komast upp með að selja fíkniefni á Íslandi en það er orðið erfiðara að fela sig fyrir fíklum, sem vilja ræna þig, en löggunni sjálfri. Það var afskaplega gott að geta notað þessa Facebook-hópa til þess að selja. Þannig náði ég til stærri hóps fólks og gat selt meira. Græðgin kostaði mig samt næstum því lífið eða heilsuna ef þessi sprautunál var jafn sýkt og þeir sögðu, mennirnir,“ segir maðurinn sem, þótt ótrúlegt sé, þakkar þeim sem rændu sig.

„Já, ég vil þakka þessum fjórum mönnum fyrir að hafa lamið mig og rænt. Það var það sem þurfti til að ég áttaði mig á því að ég á ekki þetta líf skilið. Ég á miklu betra skilið og get gert miklu meira úr lífi mínu en að láta ræna með með blóðugri sprautunál. Núna á ég tveggja ára dóttur. Fluttur í rólegt bæjarfélag utan höfuðborgarsvæðisins og stunda nám við háskóla,“ segir maðurinn sem vill aðvara ungt fólk sem er í fíkniefnasölu.

„Það er rosa kúl að selja fíkniefni á vissum aldri. Síðan fer þetta „að vera kúl“ að verða nauðsyn. Þú þarft sjálfur að eiga fyrir skammtinum. Áður en þú veist af þá ertu búinn að glata öllu. Lífinu.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.