Gjaldþrot vofir yfir Reykjanesbæ: Reykjaneshöfn neitað um fjármögnun

Bæjarráð neitaði beiðni Reykjaneshafnar um frekari fjármögnun – Greiðslufall þann 15. október að öllu óbreyttu – Viðræður standa enn yfir við kröfuhafa – Reykjanesbær í ábyrgð fyrir skuldum hafnarinnar

Náist ekki samningar við kröfuhafa um fjárhagslega endurskipulagningu bæjarfélagsins og stofnana þess verður samkvæmt sveitastjórnarlögum óskað eftir því að bæjarfélaginu verði skipuð fjárhagsstjórn.
Ráðhús Reykjanesbæjar Náist ekki samningar við kröfuhafa um fjárhagslega endurskipulagningu bæjarfélagsins og stofnana þess verður samkvæmt sveitastjórnarlögum óskað eftir því að bæjarfélaginu verði skipuð fjárhagsstjórn.
Mynd: DV ehf / Sigtryggur Ari

Útlit er fyrir að til greiðslufalls komi á skuldbindingum Reykjaneshafnar þann 15. október næstkomandi. Bæjarráð Reykjanesbæjar hafnaði í dag beiðni Reykjaneshafnar um frekari fjármögnun og hefur því stjórn hafnarinnar ákveðið að óska eftir greiðslufresti og kyrrstöðutímabili frá kröfuhöfum til 30. nóvember næstkomandi.

Ekki fæst uppgefið hversu mikla fjármuni Reykjaneshöfn þarf að standa skil á þann 15. október en ljóst er að upphæðin skiptir verulegu máli fyrir sveitarfélagið sem nú þegar á í miklum skuldavanda.

Í tilkynningu til Kauphallar Íslands kemur fram að viðræður við kröfuhafa sveitarfélagsins standa enn yfir „og taka mið af því að skuldaviðmið sveitarfélagsins verði komið niður fyrir lögbundið hámark í árslok 2022.“

Þá segir einnig að þeir kröfuhafar sem bæjarfélagið hefur átt í viðræðum við hafa veitt afslátt á greiðslum samhliða viðræðunum.

„Eigi viðræðurnar að skila árangri er nauðsynlegt að samkomulag náist við helstu kröfuhafa um verulega niðurfellingu skulda. Vinna við endurskipulagningu bæjarins hefur áhrif á skuldbindingar stofnana og félaga bæjarins, sbr. tilkynningar frá Reykjaneshöfn 2. október og fyrr í dag hinn 8. október þar sem tilkynnt var um að bæjarráð hefði hafnað beiðni hafnarinnar um fjármögnun. Reykjanesbær er samkvæmt lögum í ábyrgð fyrir skuldbindingum Reykjaneshafnar. Aðkoma kröfuhafa Reykjaneshafnar, í formi endurskipulagningar skulda, er forsenda samninga um fjárhagslega endurskipulagningu Reykjanesbæjar.“

En hvað þýðir það?

Það þýðir að náist ekki samningar við kröfuhafa um fjárhagslega endurskipulagningu bæjarfélagsins og stofnana þess verður samkvæmt sveitastjórnarlögum óskað eftir því að bæjarfélaginu verði skipuð fjárhagsstjórn.

„Stefnt er að því að leggja fram tillögu að heildar endurskipulagningu fjárhags Reykjanesbæjar og stofnana hans fyrir kröfuhafa á næstunni,“ segir í tilkynningunni.

Þessi grein er af Suðurnesjavef DV, sem er að fullu aðgengilegur áskrifendum. Áskrift kostar aðeins frá 928 kr. á mánuði.
Sjá tilboð »

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.