Á fimmta tug bíða eftir hjúkrunarrými á Suðurnesjum

„Óásættanlegt fyrir íbúa á Suðurnesjum“ - Hjúkrunarrýmin eru 118 en ættu að vera 141

Mynd: © Róbert Reynisson

Fjörutíu og þrír sjúkir aldraðir bíða eftir hjúkrunarrými á Suðurnesjum og ljóst að það stefnir í óefni ef ekkert verður gert í þessum málaflokki. Samband sveitarfélaga á Suðurnesjum telur það forgangsmál að vinna nú þegar að fjölgun hjúkrunarrýma en þeir sem sátu aðalfund sambandsins segja stöðuna með öllu óásættanlega fyrir íbúa á Suðurnesjum.

Víkurfréttir greina frá þessu.

„Gerir aðalfundurinn því þá kröfu til stjórnvalda að þau standi með sveitarfélögunum á Suðurnesjum í þeirri viðleitni að byggja upp hjúkrunarþjónustu við aldraða sem uppfyllir þörf, mæti nútíma- og framtíðarþörfum í málaflokknum og standist samanburð við önnur heilbrigðisumdæmi landsins,“ segir meðal annars í ályktuninni auk þess sem skorað er á velferðarráðherra.

„Fundurinn skorar því á Velferðarráðherra að beita sér fyrir bragarbót í öldrunarþjónustu á Suðurnesjum þar sem ríki og sveitarfélögin verði leiðandi í nýrri nálgun í heildrænni þjónustu við aldraða.“

Þá segir ef stuðst er við reiknireglu Velferðarráðuneytisins við mat á þörf ættu hjúkrunarrými á Suðurnesjum að vera 141 en eru aðeins 118. Í frétt Víkurfrétta segir að reiknireglan gerir einnig ráð fyrir því að 10-15% rýma séu skilgreind sem hvíldarrými en í dag eru einungis 8 rými af 118 með þá skilgreiningu eða 6,7%.

„Sé gengið út frá forsendum miðspár Hagstofu Íslands um fjölgun aldraðra til ársins 2025 má búast við að öldruðum íbúum á Suðurnesjum fjölgi um 857 á næstu 10 árum og 1708 á næstu 20 árum. Sé stuðst við reiknireglu ráðuneytisins þyrftu að vera 182 hjúkrunarrými á Suðurnesjum árið 2025 og 267 rými árið 2035,“ segir í fréttinni.

Þessi grein er af Suðurnesjavef DV, sem er að fullu aðgengilegur áskrifendum. Áskrift kostar aðeins frá 928 kr. á mánuði.
Sjá tilboð »

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.