Leikkonan sem varð lögmaður og þingmaður

DV tók saman menntun nokkurra þekktra Íslendinga - Fatahönnuður og þingmaður - Læknir og söngvari - Naglbítur og heimspekingur

Helga Vala Helgadóttir.
Helga Vala Helgadóttir.
Mynd: DV ehf / Sigtryggur Ari

Helga Vala Helgadóttir hefur haslað sér völl sem hæstaréttarlögmaður síðustu ár og einbeitt sér sérstaklega að málum sem snúa að mannréttindum. Hún situr nú á þingi fyrir Samfylkinguna en færri vita að Helga Vala er einnig menntuð leikkona frá Leiklistarskóla Íslands. Hún fór með lítið hlutverk í gamanþáttunum Borgarstjórinn á síðasta ári en hefur að öðru leyti helgað sig pólitík og lögfræðistörfum. Leiklistarmenntunin hefur þó eflaust komið sér vel í þingpontunni og í dómsalnum. DV tók saman nöfn nokkurra þekktra Íslendinga auk Helgu Völu sem hafa haslað sér völl í leiklist, tónlist, sjónvarpi, íþróttum og pólitík þrátt fyrir að hafa lokið námi á öðru og oft og tíðum gjörólíku sviði.

Skipuleggur skrifin í Excel

Yrsa Sigurðardóttir hefur fyrir löngu fest sig í sessi sem metsöluhöfundur glæpasagna og seljast bækur hennar í bílförmum fyrir hver jól. Yrsa er einnig menntaður byggingarverkfræðingur og lét eitt sinn hafa eftir sér í viðtali að hún væri vön að setja söguþráð upp í Excel til að skipuleggja skrifin betur.

Yrsa Sigurðardóttir.
Yrsa Sigurðardóttir.
Mynd: DV ehf / Sigtryggur Ari

Listrænn þingmaður

Halldóra Mogensen er fyrst og fremst þekkt sem þingkona Pírata og sem formaður velferðarnefndar Alþingis en hún er einn af fáum sitjandi þingmönnum sem búa yfir menntun á listasviðinu. Áður en leið hennar lá í þingsalinn hélt hún utan, 23 ára að aldri, og stundaði nám í fatahönnun og ítölsku við Scuola Lorenzo de Medici í Flórens á Ítalíu. Þá stundaði hún einnig nám í fatahönnun við Listaháskóla Íslands árið 2003.

Halldóra Mogensen.
Halldóra Mogensen.

Margir hissa

Haukur Heiðar Hauksson er einna þekktastur sem söngvari einnar af ástsælustu hljómsveitum landsins, Diktu, sem illu heilli hefur legið í dvala í nokkurn tíma. Dagvinna Hauks er af allt öðrum toga en hann útskrifaðist frá læknadeild HÍ árið 2008 og lauk sérnámi í heimilislækningum árið 2015. Hann hefur síðan þá unnið sem læknir á Sólvangi á milli þess sem hann þenur raddböndin. Í samtali við Læknablaðið árið 2010 sagði hann marga reka upp stór augu. „Ég finn reyndar að mörgum kollegum mínum þykir ekkert að þessu, finnst það jafnvel flott og sannleikurinn er sá að margir í poppbransanum verða skrýtnari á svipinn þegar þeir heyra að ég er læknir. „Ertu líka læknir?“ spyrja þeir algjörlega gáttaðir.“

Haukur Heiðar Hauksson.
Haukur Heiðar Hauksson.
Mynd: DV/ehf Eyþór Árnason

Naglbítur og heimspekingur

Vilhelm Anton Jónsson, betur þekktur sem Villi Naglbítur, hefur starfað sem tónlistar- og fjölmiðlamaður um árabil og sló fyrst í gegn sem söngvari rokksveitarinnar 200 þúsund naglbítar. Þá hefur hann undanfarin ár vakið athygli íslenskra barna á hinum ýmsu furðum alheimsins með Vísindabókum Villa. Það eru ekki allir sem vita að Villi er einnig með B.A.-gráðu í heimspeki og hefur sú menntun án efa komið sér vel við bókaskrifin.

Vilhelm Anton Jónsson.
Vilhelm Anton Jónsson.
Mynd: Gunnar Gunnarsson

Fór úr sálfræðinni yfir í sjónvarpið

Jón Ársæl Þórðarson þekkir hvert mannsbarn á Íslandi enda fastagestur á skjánum til fjölda ára. Þekktastur er hann fyrir viðtalsþættina Sjálfstætt fólk þar sem hann nær ávallt að draga fram einlægar og óvæntar hliðar á viðmælendum sínum. Þar kemur sér vel að Jón Ársæll er menntaður sálfræðingur og starfaði við fagið um árabil þar til hann leiddist út í fjölmiðlageirann.

Jón Ársæll Þórðarson.
Jón Ársæll Þórðarson.
Mynd: DV ehf / Sigtryggur Ari

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.