Þetta gerðist á Brask og brall 15 mínútum eftir að stjórnin féll

Brask og Brall er ein stærsta íslenska Facebook-síðan. Félagatalið þegar þessi frétt er skrifuð telur 108.478. Á síðunni getur fólk auglýst til sölu hluti sem það vill losna við. Stjórnandi hópsins og stofnandi er Frank Höybye.

Frank eyðir nokkrum tímum á dag til að fylgjast með að allt fari vel fram á síðunni. Frank var á Facebook þegar þau tíðindi bárust Björt framtíð hefði ákveðið að slíta samstarfinu og að ríkisstjórnin væri fallin.

Það leið ekki langur tími þar til Frank hafði breytt forsíðumynd hópsins. Í stað þess að þar væri auglýsing fyrir fyrirtæki Franks, Slökkvitæki ehf, mátti sjá mynd þar sem Flokkur fólksins var auglýstur. Það tók því ekki margar mínútur fyrir kosningabaráttuna að hefjast.

Frank segir í samtali við DV að hann hafi verið einn að verki og enginn skipt sér að þessari ákvörðun.

„Ég sá húmorinn í þessu og kaldhæðnina. Ég styð Flokk fólksins og það er ekkert leyndarmál. Þeir styðja lítilmagnann,“ segir Frank og bætir við: „Þetta fékk að standa þar til í hádeginu.“ Hann vildi að öðru leyti ekki tjá sig um nýjustu vendingar í stjórnmálum á Íslandi.

Fyrir Flokk fólksins kemur fall ríkisstjórnarinnar hins vegar á besta tíma. Flokkurinn hefur verið að skora nokkuð hátt í könnunum undanfarið en þann 2. september síðastliðinn mældist Flokkur fólksins með tæplega ellefu prósent og fengi sjö þingmenn.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.