Telja að Chris Cornell hafi svipt sig lífi

Fannst látinn í nótt. Hann var 52 ára.
Chris Cornell Fannst látinn í nótt. Hann var 52 ára.
Mynd: EPA

Margt virðist benda til þess að bandaríski tónlistarmaðurinn Chris Cornell hafi svipt sig lífi. TMZ greinir frá þessu og vísar í heimildir sínar innan lögreglunnar. Cornell, sem var 52 ára, fannst látinn inni í herbergi sínu á MGM Grand Detroit-hótelinu í nótt, en fyrr um kvöldið spilaði hann á tónleikum í borginni.

Cornell var vinsæll tónlistarmaður sem spilaði meðal annars í hljómsveitunum Soundgarden og Audioslave. TMZ vísar í frétt WXYZ-fréttastofunnar í Detroit sem segir að eiginkona Cornells hafi hringt í fjölskylduvin og beðið hann um að athuga með eiginmann sinn. Sá hafi þurft að brjóta sér leið inn í herbergið þar sem hann fann Cornell látinn.

Tekið er fram að dánarorsök hefur ekki verið gefin út opinberlega.

Cornell lætur eftir sig eiginkonu til þrettán ára, Vicky Karayiannis, og eignuðust þau tvö börn saman; Toni, 12 ára og Christopher, 11 ára. Þar áður var Cornell kvæntur Susan Silver og eignuðust þau dótturina Lillian Jean árið 2000.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.