Sirkuslistamennirnir slógu í gegn í Uummannaq

Íbúar Uummannaq á Grænlandi flykktust á opnunarhátíð Hróksins á sunnudag. Sirkuslistamennirnir Axel Diego og Bjarni Árnason léku listir sínar og svo fengu allir sem vildu að spreyta sig. Næstu dagana verður sirkusskóli fyrir börnin í Uummannaq og þá verður Inga María Brynjarsdóttir með listsmiðju og Hrafn Jökulsson kennir skák.

Sagt hefur verið að Uummannaq-eyja sé einhver fegursti stað á Grænlandi og undir það geta leiðangursmenn sannarlega tekið. Móttökur bæjarbúa hafa líka verið frábærar, og allir boðnir og búnir að aðstoða. Leiðangursmenn hafa þannig notið ómetanlegrar hjálpar frá sveitarstjórn og Barnaheimilinu í bænum, en þar eru börn alls staðar að frá Grænlandi, sem hafa misst foreldra eða búið við erfiðar heimilisaðstæður.

Íbúar eru um 1300, auk þeirra 170 sem urðu að yfirgefa þorp sín þegar flóðbylgjan ægilega skall á Nuugaatsiaq og hrifsaði með sér fjögur mannslíf og 11 hús. Börnin frá þessum þorpum ganga í skólann hér í Uummannaq og unnið er hörðum höndum að því að finna öllum fjölskyldunum framtíðarheimili. Allir íbúar á þessum slóðum, eins og Grænlandi öllu, urðu fyrir miklu áfalli í sumar og því gladdi það hjörtu leiðangursmanna þegar túlkurinn tilkynnti eftir daginn: ,,Þetta var það besta sem gat gerst í Uummannaq."

Samhliða hátíðarhöldum eru leiðangursmenn að kynna sér aðstæður í bænum, og hafa rætt bæði við fulltrúa sveitarfélagsins og annarra sem halda úti starfi fyrir börn, um ráðstöfun á þeim fjármunum sem söfnuðust í landssöfnuninni Vinátta í verki í sumar. Mikil áhersla verður lögð á að þau nýtist börnum og ungmennum.

Leiðangur Hróksins til Uummannaq er ekki fjármagnaður með söfnunarfé Vináttu í verki, heldur með aðstoð og framlögum frá fyrirtækjum og einstaklingum á Íslandi og Grænlandi.

Þeim sem vilja og geta styðja þennan mikilvægasta leiðangur Hróksins síðan starf félagsins á Grænlandi hófst árið 2003 er bent á söfnunarreikning Hróksins: 513-26-1188 og kennitala 620102-2880.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.